البعض يعدونه جريمة .. حبك لمصر

عصام منصور

( مصر ركبت الأتوبيس و قطعت تذكرة و قعدت ، مرضيتش تقعد واحدة كبيرة فى السن مكانها .. الحق مصر وقفت السواق و نزلت بين المحطات ، يالا بينا نمسك شوية فى سيرتها لأن الموضة دلوقتى إنك تناغش الكبير يمكن تشتهر على حسه ، و تتعامل معاه كأنه واحد بيلعب معاك طاولة عالقهوة .. ! ) 

ده نص الحوار الذى يتبادله الحاقدون يوميا فى كل مكان من الناقمين على مصر ، و مش عارفين حاجة مشهورة قوى و تكسف و لو خدوا بالهم منها هايسكتوا ، مش عارفين الحكمة اللى بتقول الأسد لما يمرض القرود تلعب فى ودنه ، بس بيفضل الأسد أسد و القرود قرود !


مصر مش واحد و لا شارع تعبان و لا خبر فى جرنان ، دى حاجات كتيييييييييييييييييييييييييير قوى ..

مصر أم كلثوم و عبد الحليم حافظ ، هى النيل أحد نهرى الجنة و الأهرامات آخر عجائب الدنيا السبع القديمة و اضخمها ..

هى الشيخ العلامة عبد الحليم محمود و إمام الدعاة متولى الشعراوى بلد الأزهر الذى يتعلم فيه كل جنسيات العالم ، و بلد الأف مئذنة ..

الإسكندرية عروس المتوسط ، و شرم و رأس محمد تحف عالمية ، أسوان و الأقصر أكبر متحف مفتوح فى العالم ، واحات سيوة التى يقيم فيها الإيطاليين إقامة أبدية لروعتها الأسطورية ، إحنا ملوك الكورة فى أفريقيا ست بطولات و السابعة جاية إن شاء الله ، و أبطال العالم على مستوى كل الفرق الجماعية و الفردية فى الإسكواش ..

احنا اللى اتحدينا أمريكا و بنينا السد العالى و ساعدنا كل دول افريقيا و العرب عشان تتحرر و تستقل حاربنا عشان اليمن فى اليمن و عشان فلسطين فى فلسطين و عشان الكويت فى الكويت ، و ساعدنا الجزائر و ليبيا ضد الإيطاليين و الفرنسيين .. السعودية و فلسطين و السودان فى عهد محمد على حاكم مصر و بانى نهضتها الحديثة كانوا تحت السيادة المصرية و كسوة الكعبة المشرفة كانت بتطلع سنويا مرتين فى المحمل من مصر ..

مصر مذكورة فى القرآن أكتر من أى بلد و مدينة ، و الرسول عليه الصلاة و السلام قال خير أجناد الدنيا مصر و إن أهلها فى رباط - اتحاد - الى يوم الدين لا تفرقنا الفتن و لا الغزوات الثقافية و التدخلات الأجنبية ، زار مصر العديد من الأنبياء .. هاجر زوجة سيدنا اسماعيل جد العرب و أبوهم مصرية ، و سيدنا موسى كليم الله مصرى ولد و عاش و تربى فى مصر ..

أكبر شعب عربى و أفريقى و أوسطى الشعب المصرى ، بيسموا الشعب المصرى شعب ابن نكتة عشان دمنا خفيف و بنسخر من الظروف الصعبة و ما بنخافش من حد زى شعوب تانية جبانة ..

أنا عندى مليون حاجة تخلى الواحد يحب بلده بس ده عشان قريت و جربت و فهمت .. بتحب مصر ؟